Зарина Диас (әлемнің 100-ракеткасы) жарысты турнирдің іріктеу кезеңінде Таиланд елінің теннисшісі Луксика Кумхуммен (155) кездесіп, 2:1 нәтижесімен жеңіске жетті. Бірінші партияда Луксика 6:1 есебімен басым түссе, екінші және үшінші сетте Зарина жеңісті жұлып алды. Негізгі кезеңнің бірінші айналымында Диас дәл осындай есеппен жапониялық теннисші Мисаки Доиді (95) жеңді.
Еліміздің экс-бірінші ракеткасы Зарина Диас 1/8 финалда қытайлық теннисші Чжан Шуайды (28) екі сетте 6:4, 6:2 есебімен жеңіп, турнирдің келесі кезеңіне шықты. Ширек финалда екі қазақстандық теннисші қыз Зарина Диас пен еліміздің бірінші, әлемнің 52-ші ракеткасы Юлия Путинцева бір-біріне қарсы ойнады. Бұл жұпта Заринаның мерейі үстем болды. Бірінші сетте Путинцева 6:4 есебімен жеңіске жетсе, қалған екі сет (6:1, 6:3) Диастың пайдасына шешілді. Айта кетейік, Зарина Диас пен Юлия Путинцева өзара тұңғыш рет күш сынасты.
Жартылай финалдық бәсекені Зарина америкалық Кристина Макхэйлға (62) қарсы өткізіп, үш сетке созылған ойында жеңіске жетті. Алғашқы партияда 6:4 есебімен ұтып, екінші партияда 0:6 есебімен ұтылған отандасымыз тағы да қайсарлық танытып үшінші партияда 6:3 есебімен жеңіске жетті.
Халықаралық турнирдің финалында отандасымыз корт иесі жапониялық Мии Катоға (171) қарсы ойын өткізіп, бір сағат 19 минутқа созылған матчта 6:2, 7:5 есебімен басым түсті. 23 жастағы Зарина қазақ теннисшілері арасында WTA тұжырымына енетін Japan Open турнирінің тұңғыш рет жеңімпазы атанды. Еске сала кетсек, Зарина 2014 жылы Japan Open жарысының финалына шығып, австралиялық Саманта Стосурдан жеңілген еді.
«Егемен-ақпарат»
